Shtetësi për shqiptarët në Serbi! Pse askush në fushatën e Shqipërisë nuk flet për ne?

Forumi AFEDS i bën thirrje partive në Shqipëri:

Kini pak vëmendje dhe mëshirë për Medvegjën, Bujanocin dhe Preshevën!

AFEDS ( FORUMI SHQIPTAR PËR ZHVILLIM EKONOMIK NË SERBI – ALBANIAN FORUM FOR ECONOMIC DEVELOPMENT IN SERBIA) me vëmendje të veçantë ka ndjekur fushatën e zgjedhjeve të 25 prillit në Shqipëri. Ajo që na bën të ndjehemi të indinjuar dhe shqetësuar ështe se partitë shqiptare duke u fokusuar në përplasjet e brendshme, totalisht e lanë pasdore politikën e jashtme, raportin dinjitoz me Serbinë dhe gjendjen në komunat shqiptare në Jug të Serbisë.

Duke u bazuar në nenin 8 të Kushtetutës Republika e Shqipërisë mbron të drejtat kombëtare të popullit shqiptar që jeton jashtë kufijve të saj. Andaj duket e çuditshme sesi spektri politik shqiptar në Shqipëri gjatë fushatës nuk e pa të arsyeshme sadopak të shprehë fokusimin tek gjendja e shqiptarëve në këto tre komuna, sidomos në Medvegjë, ku ka ndodhur një spastrim i heshtur etnik i shqiptarëve nga pushteti serb, përmes planit të pasivizimit apo shlyerjes së adresave.

Nuk dëgjuam as edhe një fjalë, shqetësim apo premtim se do të përkushtohen në mbrojtjen e kësaj popullate të braktisur. Do donim të degjonim posaçërisht nga opozita, apo nga PDIU-ja që përfaqson komunitetin çam: tragjedia jonë ka shumeçka të perbashket me ta.

Cili është plani konkret për ngritjen e zërit kundër autoriteteve shtetërore serbe që përmes një plani të sinkronizuar institucional po i dëbojnë shqiptarët çdo ditë nga pronat e tyre?

Përmes kësaj letre publike i bëjmë thirrje të gjitha forcave politike që të solidarizohen me Medvegjën, e cila po sherben si test per Bujanocin e Preshevën;

të ngrenë zërin për padrejtësitë që po ndodhin dhe spastrimin e perfeksionuar të strukturave shtetërore serbe!

të zotohen edhe për plan dhe projekte mbështetëse për këto komuna, ashtu sikur Serbia është e përkushtuar fuqishëm për serbët që jetojnë në Kosovë, por edhe ata që janë nëpër shtetet e tjera në rajon.

Apelojmë fuqishëm që kërkesa jonë të merret në konsideratë dhe të veprohet në drejtim të mbështetjes së procesit të parandalimit të spastrimit të heshtur etnik, të punohet për plane afirmative të kësaj çështje shqetësuese , të punohen dhe realizohen projekte mbështetëse për banorët shqiptarë etnik në këto treva të tyre.

Të koordinohemi me Kosovën në vendosjen e një plani reciprociteti kombëtar qe kalon nga dhënia e shtetësisë shqiptare me adresa në Republikën e Serbisë si kemi bërë të ditur në kerkesen tonë per Kryeministrin Rama!!

AFEDS

Muharrem Salihu