Rama për situatën në veri: Serbia po e bën mizën buall

Kryeministri i Shqipërisë, Edi Rama, ka folur për situatën aktuale në veri pas reciprocitetit me targat, duke thënë se Serbia po e bën ‘mizën buall’.

Pas takimit me kryeministrin e Kosovës, Albin Kurti, në një deklaratë për mediat, Rama tutje tha se manovrat teatrale të Serbisë në kufirin me Kosovën, nuk mbrojnë qytetarët serbë.

“S’ka asnjë diskutim që në radhë të parë mbi të gjitha është Serbia që duhet ta njohë Kosovën, është për të ardhur keq që në vend të përparimit të dialogut, sot jemi dëshmitarë të manovrave teatrale të Serbisë në kufirin me shtetin sovran të Kosovës”, tha Rama.

“Ato manovra nuk mbrojnë qytetarët serbë, ato nxisin nacionalizmin vandal të zjarrvënësve të inateve publike që janë në institucione e të cilat janë aty për t’ju shërbyer qytetarëve serbë në Kosovë. Në fakt, qytetarët serbë në Kosovë jetojnë të pakërcënuar nga askush, madje fjala bie, iu paguhen edhe faturat e energjisë elektrike nga Qeveria e këtij shteti këtu, si askujt, askund jo vetëm në ballkan, por edhe në botë. Aplikimi i reciprocitetit me targat, është një marrëveshje e arritur me kohë mes të dyja qeverive. Qëndrimi i Shqipërisë të cilin e gjykoj qartë dhe të drejtë, nga çasti i parë që u shfaq ky konflikt, është me Kosovën dhe pikë, nuk është me Serbinë”.