Kosova nuk e ka nënshkruar projektin për gazsjellësin amerikan, për shkak se qeveria kërkon më shumë informata për ta marrë këtë vendim derisa edhe afati kohor për ta nënshkruar këtë projekt ka kaluar.
Në njoftimin e qeverisë për media thuhet se qeveria ka vendosur që të përdorë programin kompakt për investime në projekte që kanë më shumë siguri.
“Duke pasur parasysh afatin kohor strikt për të zhvilluar dhe nënshkruar Programin e Kompaktit, dhe që Qeveria e Kosovës kërkon informata të mëtejshme për të qenë në gjendje të marrë vendim të mirë-informuar për të ndërtuar infrastrukturën e gazit, Qeveria e Kosovës ka vendosur që të përdorë programin kompakt për investime në projekte që kanë më shumë siguri por që gjithashtu kontribuojnë në mënyrë domethënëse drejt tranzicionit energjetik të Kosovës”.
Në ndërkohë, qeveria kosovare dhe ekipi i MCC-së kanë nënshkruar një Aide Memoire (Memorandum Ndihme) për të hapur rrugën drejt implementimit të programit dhe partneritetit në ndërtimin e një të ardhme më të mirë për kosovarët.
Ky memorandum, i nënshkruar nga ministrja e Ekonomisë Artane Rizvanolli dhe Drejtoresha Menaxhuese për Evropë, Azi, Shtetet Pacifike dhe Amerikën Latine në MCC Caroline Nguyen ka për qëllim të thellojë zhvillimin e programit të kompaktit të propozuar mes Qeverisë së Kosovës dhe MCC-së.
Qeveria e Kosovës dhe MCC-ja kanë punuar bashkarisht për të identifikuar dhe zhvilluar investimet infrastrukturore që do të ndihmojnë Kosovën të arrijë rritje ekonomike të qëndrueshme dhe gjithëpërfshirëse.
Ministria e Ekonomisë në Kosovë ka filluar punën në draftimin e Tranzicionit të Energjisë të Kosovës, derisa një barrierë kyçe për zhvillimin e sektorit privat dhe për krijimin e vendeve të punës në Kosovë mbetet paqëndrueshmëria e sektorit të energjisë që krijon kosto të larta për firmat – deri në €350 për vit.
Për ta adresuar këtë pengesë ekonomike, Qeveria e Kosovës së bashku me MCC-në kanë identifikuar një hapësirë për investime potenciale të kompaktit të përfshira në Aide Memoire të cilat fokusohen në akumulim të energjisë, forcimin e rrjetit të energjisë elektrike dhe zhvillimin e fuqisë punëtore me përfshirje gjinore dhe ngritje të kapaciteteve.
Discussion about this post