Ish-kryeministri i Shqipërisë, Sali Berisha përmes një postimi ka përmendur katër arsyet përse qytetarët duhet t’i bashkohen në protestën e thirrur për sot kundër iniciativës “Ballkani i Hapur”.
Berisha ka thënë se njëra prej arsyeve është se Vuçiqi është ministër i Milloshevqiit dhe nuk ka kërkuar falje për krimet e kryera ndaj shqiptarëve..
Arsye tjetër për të cilën Berisha ka thënë se duhet protestuar është se Kosova ka akoma plagë të hapura për të cilat Vuçiqi është njëri nga përgjegjësit kryesor dhe ai nuk është i denjë që të pritet në Tiranë e të bashkëpunohet me të.
Ish-kryeministri ka theksuar se kryeministri Edi Rama është shndërruar në kukull të Vuçiqit.
Këto janë katër arsyet e përmendura nga ish-kryeministri Berisha:
1. Vuçiq është ministër i Milloshevicit. Ai akoma nuk ka kërkuar falje për krimet e kryera ndaj shqiptarëve nga Serbia dhe vazhdon të ndjek politikën e shefit të tij!
2. Ballkani i Hapur është projekt që e rrit dhe forcon Serbinë dhe planet e Serbisë se Madhe andaj nuk duhet lejuar assesi që të konkretizohet!
3. Edi Rama po bëhet pjesë e këtyre agjendave dhe është bërë një kukull e Vuçiqit, andaj duhet ta ndalim para se të bëhet vonë.
4. Kosova ka akoma plagë të hapura për të cilat Vuçiq është nga përgjegjësit kryesor. Përveç kësaj, ai edhe mohon krimet, masakrat dhe gjenocidin e kryer ndaj shqiptarëve të Kosovës në luftë, andaj nuk është i denjë që të pritet në Tiranë e aq më pak që të bashkëpunohet me të.
Berisha kishte njoftuar dy ditë më parë këtë protestë, siç e ka quajtur ai, në mbrojtje të interesit kombëtar.
Të hënën dhe të martën, udhëheqësit e tri vendeve të përfshira në këtë proces, kryeministri i Shqipërisë, Edi Rama, ai maqedonas Zoran Zaev dhe presidenti i Serbisë, Aleksandër Vuçiq do të zyrtarizojnë këtë iniciativë që për synim thuhet ka lëvizjen e lirë të njerëzve, mallrave, shërbime dhe kapitaleve duke nënshkruar pesë marrëveshje.
Discussion about this post